文：珍寶豬
有日一位女士嚟到診所。
佢行埋嚟登記處：「阿邊個嚟咗未呀？」
我：「我唔知阿邊個係邊個，你打電話俾佢問問」
佢：「我個friend呀」
我一定知你生命中唯一嘅朋友係邊個啦。
我：「唔好意思小姐，我唔知你指嘅係邊位，你要自己打去問佢啦，你可以坐低喺度等佢」
佢：「佢幾日前話嚟」
啱啦，幾日後轉個彎到啦，佢個彎應該轉完㗎啦。
我：「我唔清楚，你去問返佢本人啦」
佢：「我介紹佢嚟㗎」
所以呢？
我冇出聲。
佢再講：「我介紹咗好多人嚟」
我用點頭之交方式同佢講：「好」
佢：「介紹費有冇得計？」
冇，收皮，走啦。
我：「我哋冇介紹費」
佢：「我介紹咗咁多人嚟都冇？阿邊個嗰啲計計埋埋都坐三望四」
咁客氣呀？咁多謝呀？我俾個叻叻你呀，收唔收貨呀？
我：「我哋診所一直都冇俾介紹費人，大家都係街坊認為醫生ok先嚟睇」
佢：「熟人先要均真計呀，唔熟唔食咩」
你唔好走埋嚟扮熟啦，冇人識你呀。
我：「可能你聽唔清楚，我哋診所一直都冇俾介紹費」
佢：「我介紹咗啦喎，你唔計返俾我，咪即係自己落格？」
我唔知你啲概念係邊個教你啦，但係你可以搵返教你嗰個人，麻煩帶佢嚟睇醫生，及早接受治療。
我：「我哋一開始就冇呢樣嘢，邊有得計俾你呢，你可能聽錯診所名，我哋診所就一定冇介紹費呢樣嘢」
佢：「間間都有㗎，共識嚟㗎，如果唔係邊個咁得閒介紹人嚟呀？」
你咪係嗰個咁得閒嘅人囉。
佢再講：「之前幾個我都未收返啲錢，我好人俾時間你計數，收你幾日前嚟嗰個朋友嘅先，方唔方便呀下？」
唔方便，你仲衰過運桔呀，你而家俾我感覺係收保護費多啲。
我：「小姐你一直喺度糾纏都冇用，我哋一直都冇呢樣嘢係冇得計俾你，如果你再係咁唔肯離開，我就會叫保安嚟請你離開」
佢：「你當你喺私人地方呀？請我離開？」
我：「係私人地方，醫生交租嘅」
佢：「我唔再介紹人嚟睇你幾時執呀！」
佢終於肯離開診所。
多謝你唔再介紹你啲同類嚟。
珍寶豬簡介：熱愛歡樂嘅診所工作，經常唔覺意唔知點解唔小心咁幫醫生趕客。